ANGEN SESAPI I
Mirib nu sangsaya sayan kebiat-kebiat lintange
ngerajah gulungan ombake tegeh nyejehin
ngentas ring geliapan matan luhe, ngancan saru
tan maguna
sig dalem daken tengah pasihe
ane encen kone madan daken
sabilang celepin kenehe konyangan bek
magpag matan luhe ngurukang keneh bawak
bawak pisan!
keto luh ngegolang keneh, ngeca semaya
kadirasa kapupungan, naduanin ngeraksa keneh
sakewala bucun matan luhe nyaruang kendel
kadakep baan sebet ngitungang keneh
lintange akit sig langit, liu mapasangan
kaboros bulan masunaran ngutang samaya kingking
”nak mula tresna matane ngenehang”
ngancan buduh metekin warsa majalan
yen sunia mapunduh kal engkebang : luh jegeg
sig duur sunia langite
galang
ANGEN SESAPI II
Sakewala nyesed sabilang dina matemu
suba dadi nabdabin deweke nyaruang liang
ngapak-apak ngerajah inguh paling
mula ulian sebet mengkeb di lawat bayune
nengil
ngulgul kasunia ning dedet
angen ne angen, nyen ngakuin, nyen ngelah
lamun sabilang ngenah sinah runtag
ngelemesin sang sesapi uli pitehan
sebet
ngudiang angen nengil tan kaucap
wainan matemu ngancan ngamatiang keneh
; sekabesik sesapi nyandang ilang
magpagin langit
ngulungin lawat, magpag ujan
luh, sesapine ene nyen ane ngelahang
kadirasa maboros
baan lilih:
tareke buka keto, luh?
tareke buka keto, luh?
ANGEN SESAPI III
Sakewala sesapine magpag angen
nadiang ilik langite malawat tresna
andap gati kenehe
sakewala sesapine enu magpag angen
ngindang ngejohin pengawakan, makeber ngentasin dedet
sang penapakan :
maboros sunia
kaboros baan inguh
lan sesapi makeber tegeh nebekin langit
nebekin tresna
ngalayutin lintang
maglayut
negul purnamaning ning ning
ngurung masunar galang
sig keneh
0 komentar:
Posting Komentar